Brew Bay Beer: sa beer firm chi faghet birras chi contant sos sabores de Sardigna

* Dae sa terra a sa butìllia * - Amistade e birra podent èssere ingredientes de sa resèssida de una faina importante. Mescrados a pare, custos duos elementos donant vida a unu progetu birraiu, sa Brew Bay Beer, una realidade brassìcola chi faghet sa cuntentesa manna de sos palados chi istimant sa birra bona.

Sa Beer Firm de Cuartu Sant'Aleni est una beer firm primorosa chi ligat a s'amistade de sos sòtzios sa passione manna pro su mundu ispantosu de sa birra.

Brew Bay Beer at una narratzione totu sarda chi tesset sos filos de s'istòria diferente: unu contu chi prendet s'istòria de custos amigos in pare cun sa birra. Su resurtu est unu traballu poèticu in ue a faeddare sunt sos nuscos e sos sabores de sas bèvidas produidas.

Sas bèvidas creadas dae custos fìgios de Sardigna sunt etichetas chi faeddant de s'ìsula e mescamente de su Campidanu de giosso e de sa segunda tzitade de sa provìntzia de Casteddu: Cuartu.

Cale si siat istile, onni ampudda de custa beer firm costoit s'idea originale chi aiant in conca sos sòtzios de Brew Bay Beer. Sa summa de totus sas ideas at comente resurtu finale birras licantzas, chi si iscoberrint e si torrant a iscobèrrere. Onni eticheta dat boghe a sa particularidade sua e a su caràtere chi la caraterizat: particularidade e caràtere chi la faghet diversa dae sas àteras sorres.

Su frutu de su traballu de sos pitzocos de Brew Bay Beer sunt chimbe sas etichetas màstrinas. Onni bèvida produida at unu colore bellu carcu e costoit nuscos crispos. Onni birra paret chi nos cumbidat a la tastare.

Q-NATA (birra in istile Belgian Ale), E.QU.A (in istile American Pale Ale), DARQSIDE (bèvida in istile Double Dark I.P.A.), DOXI - Q-N.12 (in istile Dark Strong Ale) e Murisca Qool (birra in istile India Pale Ale ) sunt sas birras licantzas otentas dae su traballu e dae sa passione de sos sòtzios de sa beer firm cuartesa. Sunt bèvidas chi praghent e chi ant àpidu prèmios e reconnoschimentos importantes. Tra sos ùrtimos, sa medàllia de prata in sa categoria "Dark Ipa" a su "Barcelona Beer Challenge" cun sa birra DarqSide, una bèvida marigosa e echilibrada fata cun mele de mudegru e de ruu chi at unu nùmene chi ammentat sos Pink Floyd e "Star Wars".