"Cantina Oliena Nepente": bèvidas chi faeddant de su territòriu ulianesu

Su Nepente de Ulìana unu binu Cannonau chi at caraterìsticas ùnicas
2 Luglio 2020
cantina sociale Oliena

* Dae sa terra a sa butìllia * - Ulìana est una bidda ligada a su binu, est inoghe chi at domo sa "Cantina Oliena Nepente", una sotziedade coperativa Agricola tra sas prus famadas de su territòriu barbaricinu.

Su trinòmiu Ulìana, bide e binu est nàschidu in su 1500 a pustis de Cristos cun sos fadres francescanos, meres de una bìngia manna e de unu laboratòriu in ue si traballat s'àghina pro la trasformare in binu.

Dae su 1950 a giùghere sa bandera de bidda vinicola de primore est sena de duda pròpiu sa batida de sa cantina sotziale "Oliena Nepente"; una realidade minore cunforma a sas àteras coperativas de s'ìsula, chi est però arraighinada bene e chi mantenet in vida s'economia de custa bidda. Unu logu chi at fatu de su binu unu bucone mannu de sa cultura sua.

S'importàntzia chi at su binu pro Ulìana la si podet cumprèndere dae sos muros de sa cantina. Muros chi faeddant pro mèdiu de sas paràulas de Gabriele D'Annunzio, de Grazia Deledda e de Salvatore Satta, iscritores chi ant mentovadu in sas òperas issoro Ulìana e su
binu suo: su Nepente.

Sa cantina coperativa ulianesa est fata de una chentina de sòtzios, chi ant onniunu pagu prus o mancu de un'ètaru de bìngia. Su prus de custas sunt propriedades cun bides coltivadas a sa sarda, unas cantas matas lompent a àere 80 annos e prus e sunt allevadas pro ultres de su 90% cun àghina Cannonau. De onni manera, in sas bìngias s'agatat puru una parte minore de crannatza, una ratza de àghina bianca nuscosa e autòctona.

 

binos_ulianesos

Sos terrinos renarzos, sa coltivatzione a sa sarda e su clima sicu sunt sos ingredientes de bèvidas chi ant caraterìsticas ùnicas. Su Cannonau Doc produidu in su territòriu de sa bidda dae su 1972 leat su nùmene de "Nepente di Oliena".

Sa "Cantina Oliena Nepente" impreende mètodos traditzionales e tecnologias innovativas at resurtos interessantes e su 90% de su binu produidu at unu mercadu sardu, italianu e internatzionale puru.

Totus sas ampuddas chi essint dae custa cantina sunt garantzia de calidade manna e de caràtere. Su caràtere ùnicu de sos binos de su territòriu ulianesu lu agatamos totu in sa tassa.

Sos binos "Iririlai", "Corrasi-Nepente di Oliena Riserva", "Nepente di Oliena", "Lanaitto-Isola dei Nuraghi IGT", "Logheri", "Domina Lunae IGT", "Dionisi", paris cun sa "Grappa di Cannonau Invecchiata", sa "Grappa di Cannonau di Neppente" e s'ispumante "OroRosa" , sunt totus ispessialidades de Sardigna chi pintant bene territòriu ulianesu.

Onni eticheta produida dae sa “Cantina Oliena Nepente” est una prenda de tastare e fàghere bufare.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aggiungi un commento