"Cantina Oliena Nepente": bèvidas chi faeddant de su territòriu ulianesu

* Dae sa terra a sa butìllia * - Ulìana est una bidda ligada a su binu. Est inoghe chi at domo sa "Cantina Oliena Nepente", una sotziedade coperativa agricula tra sas prus famadas de su territòriu barbaritzinu.

Su trinòmiu Ulìana, bide e binu est nàschidu in su 1500 a pustis de Cristos cun sos padres frantziscanos, meres de una bìngia manna e de unu laboratòriu in ue si traballat s'àghina pro la trasformare in binu.

Dae su 1950 a giùghere in artu sa bandera de bidda vinicola de primore est sena de duda pròpiu sa nàschida de sa cantina sotziale "Oliena Nepente"; una realidade minore cunforma a sas àteras coperativas de s'ìsula, chi est però bene arraighinada e chi mantenet in vida s'economia de custa bidda. Unu logu chi at fatu de su binu una parte importante de sa cultura sua.

S'importàntzia chi at su binu pro Ulìana la si podet cumprèndere dae sos muros de sa cantina. Muros chi faeddant pro mèdiu de sas paràulas de Gabriele D'Annunzio, de Grazia Deledda e de Salvatore Satta, iscritores chi ant mentovadu in sas òperas issoro Ulìana e su binu suo: su Nepente.

Sa cantina coperativa ulianesa est fata de una chentina de sòtzios, chi ant onniunu prus o mancu un'ètaru de bìngia. Su prus de custas sunt propriedades cun bides coltivadas a sa sarda, unas cantas matas lompent a àere 80 annos e sunt allevadas pro su prus de su 90% cun àghina Cannonau. De onni manera, in sas bìngias s'agatat puru una parte minore de Granatza, una ratza de àghina bianca nuscosa e autòctona.

Sos terrinos arenargios, sa coltivatzione a sa sarda e su clima sicu sunt sos ingredientes de bèvidas chi ant caraterìsticas ùnicas. Su Cannonau Doc produidu in su territòriu de sa bidda dae su 1972 leat su nùmene de "Nepente di Oliena".

Sa "Cantina Oliena Nepente" impreende mètodos traditzionales e tecnologias innovativas at resurtos interessantes e su 90% de su binu chi produit at unu mercadu sardu, italianu e internatzionale puru.

Totus sas ampuddas chi essint dae custa cantina sunt garantzia de calidade manna e de caràtere. Su caràtere ùnicu de sos binos de su territòriu ulianesu lu agatamos totu in sa tassa.

Sos binos "Iririlai", "Corrasi-Nepente di Oliena Riserva", "Nepente di Oliena", "Lanaitto-Isola dei Nuraghi IGT", "Logheri", "Domina Lunae IGT", "Dionisi", paris cun sa "Grappa di Cannonau Invecchiata", sa "Grappa di Cannonau di Nepente" e s'ispumante "OroRosa" , sunt totus ispessialidades de Sardigna chi pintant bene territòriu ulianesu.

Onni eticheta produida dae sa “Cantina Oliena Nepente” est una prenda de tastare e fàghere bufare.