Sa sustenibilidadi de SheepToShip LIFE

S'eco-innovatzioni sarda de su mundu de su lati
20 Marzo 2021
terra

Terra - Si lamat SheepToShip LIFE e est unu progetu sustenìbili cofinatziau de su Programma europeu LIFE, Sutaprogramma "Azione per il Clima". SheepToShip LIFE tenit sa punna de lòmpiri a amenguai sa produtzioni de carbòniu produida de is allevamentus e de is casifìtzius.

Cun SheepToShip LIFE sa Sardigna si mudat in nd'unu labboratòriu po compudus ambièntalis, chi tenit s'obietivu de isperimentai sistemas po abblandai su clima atressu de s'eco-innovatzioni, siat in su mundu s'allevamentu siat in su mundu de is casifìtzius.

Incumentzau in su 2016, SheepToShip LIFE lompit ocannu a sa fini de su caminu suu. Su progetu finantziau cun 1,5 milionis de eurus pagu prus o mancu, tenit comenti protagonistas is nòminis prus famaus de is cunsòrtzius de su casu de brebei DOP de Sardigna.

SheepToShip LIFE at tragau is pastoris e finas is indùstrias chi trasformant sa matèria primàrgia. Bisòngiat a sutalineai puru ca de candu su progetu est cumentzau, funt bessias a pillu costumàntzias virtudosas meda, chi permitint de megiorai is prestatzionis de dògnia sistema produtivu.

terraPo mantènniri bellus is terrenus si funt mòvias is bestias de una terra a s'àtera; custa pràtiga permitit a sa vegetatzioni de sighiri a crèsciri e a is brebeis de papai a manera naturali. Po fai custu is circadoris de su CNR ant giau a s'isperimentatzioni cuàturu ètarus de terra innoia crescint beni is matas autòctonas perennis (aici sa terra non si depit semenai totora).

S'isperimentatzioni amenguat su nùmeru de is bestias allevadas ma fait po finas risparmiai s'addescu a is allevadoris, chi gosant aici de unu vantàgiu econòmicu de importu. No est totu, poita sa produtzioni allargada bogat prus pagu CO2.

Duncas, su progetu SheepToShip LIFE dimustrat ca candu si ponint a campu polìticas abbistas de isvilupu rurali podint nàsciri puru progetus sustenìbilis aintru de cumpartus comenti cussu de s'allevamentu e cussu de s'industria chi traballant is matèrias primàrgias cosa insoru.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags