Sas DOC de Sardigna

In sa Mesa - Sighit su biàgiu in intro de su mundu de sos marcos chi amparant sos produtos de Sardigna. Semus faeddande de sos marcos chi ant comente finalidade sa de garantire una protetzione majore contra a sos trastocos e contra a su fenòmenu de s'"talian sounding", fenòmenu chi oramai est difusu in totu su mundu.

Sa DOC, est a nàrrere sa "Denominazione di origine controllata", rapresentat unu balore agiuntu pro s'economia sarda.  Pro mèdiu de tale eticheta, difatis, est possìbbile ampare e esportare produtos fatos in Sardigna in logu istràngiu.

Ma ite est sa DOC? Sa "Denominazione di origine controllata" est una sigla istòrica. Sos primos produtos ant otentu custu reconnoschimentu in su 1966 e sa primu lege in matèria at giai fatu 59 annos. Su riferimentu est a su  D.P.R. 930/1963.

Sa DOC, lu depimus sutalineare, est una denominatzione impreada in enologia pro indicare e tzertificare unu binu de calidade. Unu binu chi at caraterìsticas atribuìbiles a sas particularidades de zona de produtzione, comente sa natura de sos terrinos, sa ratza de sa bide, s'esposizione in ue s'agatant sos fundos, sa manera de produtzione impreada (sistemas de agricultura, pudadura etc.). Custu reconnoschimentu est atribbuidu a sos binos produidos in zonas de dimensione minore e de dimensione mesana.

In die de oe, in Sardigna bi sunt 17 binos chi ant sa classificatzione DOC. Sos binos chi ant sa tzertificatzione de calidade sunt: "Alghero DOC"; "Arborea DO"C; "Cagliari DOC"; "Campidano di Terralba o Terralba DOC"; "Cannonau di Sardegna DOC"; "Carignano del Sulcis DOC"; "Girò di Cagliari DOC"; "Malvasia di Bosa DOC"; "Mandrolisai DOC"; "Monica di Sardegna DOC"; "Moscato di Sardegna DOC"; "Moscato di Sorso-Sennori o Moscato di Sorso o Moscato di Sennori DOC"; "Nasco di Cagliari DOC"; "Nuragus di Cagliari DOC"; "Sardegna Semidano DOC"; "Vermentino di Sardegna DOC" e "Vernaccia di Oristano DOC".

Pro otènnere  su reconnoschimentu de "Denominazione di Origine Controllata" sos produtores depent avantzare una rechesta a sa Regione Autònoma de Sardigna. Sa RAS  at a dèpere fàghere totus sos averiguamentos subra sa currispondèntzia tra sa denominatzione e sas caraterìsticas pedidas. Si sos òrganos tènnicos de sa RAS espressant unu parre a favore, sa rechesta at a bènnere mandada a su "Ministero delle Politiche Agricole e Forestali".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22