Su binu "Nebbiolo" de Sardigna est tra sos mègius de Itàlia

Aprofundimentu de su lunis - Su binu "Nebbiolo" de Sardigna est sa sos mègius de Itàlia.

A bìnchere sa "Gran Medaglia d'Oro" est su binu "Babbi Jolzi" de sas "Tenute Villa Lauras". Su prèmiu arribat dae s'editzione XXI de su "Concorso Enologico Internazionale Città del Vino" chi s'est isboligadu in Sitzìlia dae su 12 a su 14 de su mese de maju de su 2023. Sa manifestatzione est organizada dae s'"Associazione Nazionale Città del Vino".

Sa "Gran Medaglia d'Oro", est una medàllia de oro importante pro sos binos de s'ìsula.

A firmare su binu "Babbi Jolzi" de sas "Tenute Villa Lauras" est s'enòlogu gadduresu Andrea Pala, unu professionista chi no est nou a batire a domo prèmios importantes. Faeddamus de su matessi Pala chi est istadu su mègius enòlogu de Itàlia de su 2021. De su matessi Pala chi est tra sos enòlogos premiados de prus in sos ùrtimos annos. De su matessi Pala chi est finas consulente de aziendas sardas e italianas de importu mannu. Pala, difatis, traballat peri in sas Marche, in Toscana, in su Làtziu, in Calàbria e in Campània. Calicuna chida faghet, pro fàghere un'esèmpiu feti, Pala, cun su binu biancu "Vermentino di Gallura Superiore Docg", at conchistadu a sa giuria de su "Vinitaly". S'annada de su 2021 est istada premiada dae sos giùighes internatzionales de su su "5StarsWine" cun su puntègiu de 95/100. Comente su mègius Vermentinu de Itàlia. Tra sos bator mègius binos de Sardigna, introduidu peri in sa top 15 italiana.

Pro Pala, ma peri pro sa Sardigna, "La Gran Medaglia d'Oro" a su "Concorso Enologico Internazionale Città del Vino" est unu resurtadu ùnicu, e lu est massimamente si si faeddat de una manifestatzione enologica chi at avaloradu 1.400 tipos de binu, lòmpidos de onni bìculu de Itàlia, Frantza, Germània, Ispagna, Portogallu, Àustria, Lussemburgu, Croàtzia, Moldàvia, Brasile e Sud Corea. "S'Itàlia - acrarat Pala a ANSA- fiat rapresentada dae 19 regiones" duncas fiat rapresentada de sa majoria de sas regiones chi faghent su territòriu italianu.

A sos binos de Sardigna, sunt istadas atribuidas 20 medàllias de oro e sete medàllias de prata.