"Pizzerie d'Italia 2024": in Sardigna 19 insignas, 4 "Tre Spicchi" e unu prèmiu ispetziale

Aprofundimentu de su chenàbura - Creatividade e traditzione in sa ghia noa de "Gambero Rosso" "Pizzerie d'Italia 2024". Una ghia chi si contat finas de una Sardigna chi batit a domo 19 insignas, 4 "Tre Spicchi" e unu prèmiu ispetziale.

Sa pizza, si ischit, est un'"evergreen" chi non connoschet intrinada, antis, gràtzias a sa creatividade e s'abilesa de sos mastros de pizza est capassa de si torrare a imbentare.

In "Pizzerie d'Italia 2024" agatamus 735 pizzerias, esaminadas a incumentzare dae su traballu e dae sa chirca de sas matèrias primàrgias impreadas pro fàghere sa cumassa e finas pro s'ammadricadura.

Premiadas sas insignas chi ant chistidu unu ligàmine cun su territòriu, chi ant recuperadu sos produtos antigos, chi ant dimustradu originalidade in sos acrobamentos. Premiada finas sa coghidura siat in su forru a linna siat in su forru a elètricu.

Nuscu, ligeresa e sodesa, sunt sos elementos esaminados a su tastu leende in aprètziu onni istile de pizza. No est totu, importante finas su serbìtziu: sa pizza a tastu devet èssere serbida in cìtulas.

Sos "Tre Spicchi", sas "Tre Rotelle" e sos "Premi Speciali"

In sa classìfica cun unu puntègiu espressadu in tzentèsimos sos "Tre Spicchi", est a nàrrere su primore tra sas "pizzerie al piatto", sunt 103, mentras sas "Tre Rotelle", est a nàrrere sas "pizzerie al taglio" mègius sunt 14 e 28 sunt sas insignas premiadas cun un'isteddu pro 10 annos consecutivos.

Sas pizzerias de Sardigna introduidas in "Pizzerie d'Italia 2024" sunt 19 cun una distributzione bona in totu s'ìsula, mancari chi sa "superstar" pro nùmeru e calidade de insignas siat Casteddu.

Sos "Tre Spicchi" in Casteddu los leant "Framento" e "Maiori". In Tàtari "Re | Mi" e in Tèmpiu "Pizzeria Bosco". Mentras sa "Migliore Carta Delle Bevande" tocat a "Framento" de Casteddu.

Sos primores sunt medas, ma a si fàghere notare est "Framento", chi at otentu unu prèmiu dòpiu. Pierluigi Fais batit a domo su "Premio Speciale", gràtzias finas a s'issèberu de sos binos e de sas birras. Binos e birras chi faeddant in sardu, ma finas in italianu e in àteras limbas.