Regione, respinta sa motzione de discunfiàntzia contra a Solinas

Comente si podiat immaginare, su Consìgiu regionale at respintu sa motzione de discunfiàntzia contra a su presidente de sa Giunta Christian Solinas a pustis de su pàrrere de su delegadu suo in sa cunferèntzia de sas regiones in contu de autonomia diferentziada. Solinas, in sos concruos, at faeddadu de «valore istrumentale de sa motzione», de una «crae farsa in cherta de imbertas de fine legisladura cunforma a protzessos fisiològicos de assentos guvernativos noos». Opositzione atacada in sa parlata sua: «priva de veridade e de progetu» e «cun argumentos sena prègiu giurìdicu perunu» pro more de una riforma costitutzionale de su tzentru manca chi a custa autonomia diferentziada «a geometria variàbile» aberit sa ghenna. Solinas at ammentadu s’istòria de su partidu suo («su prus antigu partidu federalista europeu») narende a sos «catedràticos noeddos chi essint a campu in custa àula dende letziones de autonomia e de sardismu» de si l’istudiare. A pustis de àere naradu chi su de su delegadu suo in cussa cunferèntzia fiat unu «pàrrere chi pertocat a sos presidentes de sas regiones», Solinas at criticadu su «degradu lessicale», sa «personalizatzione» de sos atacos de una minoria cunsiderada comente «sa peus de s’istòria autonomìstica». Minoria chi, a bisu suo, at a fàghere guvernare su tzentru dereta «pro àteros 15 annos». Motzione respinta dae 36 consigeris. Petzi 21 sos favorèvoles.

m.p.