Regionales, sas chimbe propostas de Sardegna chiama Sardegna

Sardegna chiama Sardegna at fatu s’assemblea sua eris, in su parcu de Sant’Austinu de Abbasanta. Custas sa chimbe propostas suas, «unu disafiu – ant naradu – a totu sas fortzas polìticas e sotziales chi si sunt opostas, in intro e in foras de su Cussìgiu regionale, a sa majoria atuale». Sa prima pertocat su traballu e su mundu econòmicu cun sa punna de unu «Cungressu de su pòpulu sardu pro ammodernare su tessutu econòmicu»; sa segunda proposta cuntenet «polìticas giovaniles ativantes» e una «lege cuadru pro s’imbetzamentu ativu» in intro de una trìbide temàtica salude/allogu/welfare; sa de tres est in contu de sièntzia e cultura cun sa co-ufitzialidade de su sardu e unu «pianu pro sa cultura». Su tema de s’annestru bèllicu e de s’isfrutamentu green nche l’agatamus in sa de bator (mèngua e bonìficas de polìgonos, Agentzia sarda de s’Energia); s’ùrtima pertocat sa partetzipatzione e sa democratzia cun s’«Assemblea costituente sarda pro sa revisione de s’Istatutu».