Chistione Todde, su 15 comintzat s'istrutòria

Mèrcuris su 15 de ghennàrgiu no amus a ischire cosa meda de prus in riferimentu a sa chistione polìtica chi nos est acumpangende dae su comintzu de s’annu. Ma a banda de mangianu si òviant sos cumponentes de sa Giunta de sas eletziones de su Cussìgiu regionale pro aviare s’istrutòria pro su chi pertocat s’ordinàntzia de su Cullègiu de garantzia eletorale in intro de sa Corte de Apellu de Casteddu chi at pedidu sa decadèntzia de sa presidente Alessandra Todde. Su cabu de s’esecutivu regionale, a su presente, devet rispòndere pro unas cantas irregularidades in sa rendicontatzione de sos gastos in campagna eletorale. In sos addòbios in fatu ant a analizare su provedimentu collende datos, documentos e àteros elementos ùtiles. Serrada s’istrutòria tocat a su Cussìgiu regionale a s’espressare.