Política: Zuncheddu, "acanta de is poligonus e de is zonas industrialis no si morrit de becesa

(IlMinuto) – Casteddu, 24 de su mes''e làmpadas - "Parrit ca su pópulu sadru si pighit maladias cun facilidadi. Difatis acanta de is poligonus e de is industrias no si morrit prus de becesa. Est custu su cummentu tristu fattu de sa Consillera regionali (e médicu) de is Rossomori, Claudia Zuncheddu, po sa presentada a sa stampa de diversas interrogazionis chi fueddant de su “monitoraggio del Poligono interforze di Quirra” e de su fàbbricu de s'areoportu. In sa cuferénzia, chi s'est tenta in sa saba de imprenta de su Consillu, at participau puru Mariella Cao de su Comitau Gettiamo le basi.
Is atividadis de su Poligonu interforze - si podit ligiri in s'interrogazioni presentada su 19 de su mes''e làmpadas - "funt chistioni de grandu protesta de parti de sa genti chi denunziat efetus malus po sa saludi, causaus de is medas cambiamentus geneticus chi portant tumoris a su sistema emolinfaticu (leucemias, linfomas, ecc.) de is personas chi bivint in is biddas acanta de su poligonu, su màssimu in sa frazioni de Quirra". S'acapiamentu tra is basis militaris e custus malis esti stetiu cunfirmau puru de unu decretu nou "a pustis de otu annus de lota - at ispiegau Mariella Cao - seus arrenèscius a otèniri sa cunfirma de sa responsabbilidàdi de parti de su Ministeru de sa "Difesa". Su Dpr 37 de su 2009 at donau su dinai po su pópulu corpiu".