Rossomori: Cuartu Sant'Alèni, sa Giunta Ruggeri no si rapresentat

(IlMinuto) – Casteddu, 28 de su mes''e argiolas - "Nesciunu rapresentat is Rossomori aintru de sa Giunta Ruggeri e de su Consillu comunali de Cuartu Sant'Alèni. Chini a is elezionis regionalis s'est presentau cun is listas nostras no s'est a pustis iscrittu a su movimentu". Ddu at nau su Segretariu provinziali de is Rossomori, Luigi Concas, in sa cuferénzia stampa de presentada de su círculu "Michelangelo Pira", cun su cali su movimentu "federalista, identitariu e progressista" bollit ponni is próprius arrèxinis in sa terza citadi de sa Sardigna.
Su Consilleri Lello Marci - ispiegant - chi a is elezionis regionalis si furiat presentau cun is sardistas de sinistra, tenit immoi in busciaca
sa tèssera de su Pd. Sa distànzia pigada de sa Giunta de centrusinistra chi guidat Cuartu Sant'Alèni de su 2005 no est scéti formali. "Est mancau - ispiegat su militanti - s'impegnu de su síndigu Ruggeri a chistionai cun is ateras forzas politicas e cun is citadinus". Is Rossomori castiant cun interessu a is ateras forzas de sa sinistra e de s'indipendentismu: "Tocat a traballai cun is aterus indipendentistas po podi fai una confederassioni de sinistra - at nau s'ex Consilleri comunali Sergio Falconieri - chi fazat un'unicu fronti partendi de sa lota contra a su nucleari".