Isbarazzu de via Castelfidardo: Rossomori, "Est ora de dd'acabbai cun su rimbotu de responsabbilidadi"

(IlMinuto) - Casteddu, 24 de su mes''e austu - "Su movimentu de is Rossomori est acanta de is abitantis de via Peschiera e de via Castelfidardo. Is domus de custa genti ant tentu damnus po mori de is zèdimentus de s'asfaltu de s'istrada. A custa genti sa diri de mesaustu esti stetiu notificau cun d'unu pragoni de su Síndigu de su Comunu de Casteddu, s'isbarazzu de is domus inturu cincu diris e s'immediatu agiustu de custas a càrrigu de is meris". Ddu narant cun d'unu comunicau stampa su cordinamentu casteddaiu de is Rossomori e su consilleri comunali de is sardistas de sinistra Claudia Zuncheddu. "Custa misura - sustènint is Rossomori - e is fatantis sgarrigus de responsabbilidadi tra is Assessoris chi si depint ocupai de custas chistionis e su Vicesíndigu, ant creau una cundizioni de precariedadi e aterus incòmodus a is nostrus concittadinus". "Is Rossomori - spiegat su documentu - pedint a su Síndigu e a is aterus entis comunalis casteddaius chi si ocupant de custa chistioni, de no evitai su própriu doveri istituzionali e de donai acoitu una resposta bera a is drammàticus bisóngius de custas famílias chi, cun su traballu insoru, ant participau a fai crèsciri sa comunidadi e chi immoi funt 'bressallu' de s'ausenzia de atúliu de s'amministrazioni comunali". "No est prus tempus - concluit su cordinamentu casteddaiu de is sardistas de sinistra - de sgarrigus de responsabbilidadis istituzionalis. Est arribbau su momentu de tutelai is bisóngius giustus de custa genti".