80 turris de 130 metrus in su mari de is Arenas: crescit s'opposizioni a su progettu de is "industrialis de su bentu"

29 Cabudanni 2009
(IlMinuto) – Casteddu, 29 de su mes''e cabudanni - Sa chistioni de sa centrali eolica "off shore" in Is Arenas bidit comenti protagonistas puru is istituzionis de su territoriu: oi, in sa sedi de sa provìnzia de Aristanis, est in programma un'atóbiu cun sa partecipazioni de su Presidenti Pasquale Onida, de su Prefettu, de su rappresentanti de sa Capitaneria de portu e de is Síndigus de is comunus protagonistas. In giogu dd'est su meda contestau progetu presentau de sa Is Arenas Renewables Energies srl po sa realizzazioni de una centrali eolica: 20 turris de s'altesa de 130 metrus prantadas in mesu a su mari, in gradu de prodùsiri una potenzia de 320 megawatt. Su tretu scioberau de s'azienda s'agatat a facc''e su litorali de Is Arenas, Su Pallosu e S'Archittu e interessat una superfici de prus de 21 milionis de metrus quadrus (fonti "Gruppo di intervento giuridico"). Po impediri sa costruzioni de sa centrali, su "Gruppo d'intervento giuridico" e is "Amici della terra" ant mandau su 20 de su mes''e cabudanni unu recursu contra a su rilasciu de sa concessioni demaniali marittima a sa Is Arenas Renewables. Is duas associazionis - si podit liggiri in d'una nota - "torrant a arremacciai sa sicca opposizioni a s'eolicu selvaggiu, chi no pigat in considerazioni is caratterìsticas particularis de su territoriu interessau, e nemancu is effettivas nezzessidadis energeticas, ma benit determinau de is interessus de is industrialis de su bentu a damnu de sa collettividadi". Contra a sa costruzioni de sa centrali ddoi at essi puru unu sit-in convocau de unu comitau spontaneu. S'apuntamentu est po domìnigu 4 de su mes''e ledaminis a is 10.00 in Is Arenas, a facc''e su bar "Da Bastiano". "Naraus no a cust'iscempiu - scrint is organizzadoris in Facebook - e faeus biri a custa genti ca s'ant a depi scontrai cun personas beras e no scéti cun is firmas de una petizioni".
© RIPRODUZIONE RISERVATA