Iscola: bullada sa mozioni anti Baire-Gelmini. Is precarius: "No bolleus sa limusina de su Stadu e de sa Regioni".

(IlMinuto) – Casteddu, 23 de su mes''e cabudanni - "Esti stetia bullada (42 votus contràrius e 25 a favori) sa mozioni de su centrusinistra in Consillu regionali chi proponiat de scancellai s'acórdiu Baire-Gelmini po s'iscola sadra. S'orientamentu de sa Giunta regionali esti stetiu cunfirmau de sa magiorànzia in Consillu: esti stetiu aprovau in veci (39 votus favorevolis e 22 contràrius) sa "rimodulazioni" de s'intesa tra sa Regioni e su Ministeru de s'"Istruzione". Sa própriu intesa bullada senz'apellu de is precarius de s'iscola chi ariseru a merì - in su mentris chi ddoi furiat su dibbatidu in àula - ant manifestau asuta de is porticus de via Roma. "No est beru - si podit liggiri in d'unu bolantinu passau de su comitau - ca sa chistioni de is precarius at essi agiustada cun is assignus de disponibilidadi, chi funt  comenti una forma de agiudu de disocupazioni a carrigu de sa Regioni". Is traballantis chi ant a pigai is assignus de disponibilidadi - sighit su testu - ant a tenni diritu a custu agiudu statali e ant essi obbligaus a acetai dognia incumbènzia in sedis foras de contu puru po pagus oras de traballu". "No bolleus sa limusina - precisant is precarius - de su Stadu e de sa Regioni. Bolleus su respetu de su diritu a su traballu po totus e bolleus un'iscola pubblica de calidadi".