Crabònia-Igrèsias: s'assessori Micheletti lassat Rifondazione

(IlMinuto) – Casteddu, 27 de su mes''e ledaminis - "Sa rinunzia de sa Giunta provinziali at essi po mei oi casi una liberazioni, ma (...) mi seu cunbinta de sa nezzessidadi de finiri su mandau miu in s'interessi scéti de su territoriu e in su arrespetu de su programma chi at tentu sa fidúcia de is eletoris in su 2005. Duncas lassu cun no pagu suferénzia unu partidu chi no riconosciu prus, unu partidu chi no est prus su partidu aundi seu nàscia e créscia politicamenti". Cun custus fueddus - scrittus in d'una lítera pubblica - s'assessori provinziali de sa Cultura, de su Sport e de s'Ispettaculu de sa Provìnzia de Crabònia-Igrèsias, Cinzia Micheletti, annunziat su própriu abbandonu de su Partidu de sa Rifondazione Comunista. In is diris passadas, su segretariu regionali de su Prc, Gianni Fresu, iat pediu a s'assessori Micheletti de lassai s'esecutivu, chi de su princípiu de s'annu bidi comenti protagonista puru forzas de su centrudestra. "Podit essi biu a destra - scririt Micheletti - s'aghillimentu de unu partidu de centru chi in Italia tenit una clara posizioni de antagonismu a su Guvernu e chi in medas realidadis giai guvernat cun su centrusinistra? Podint zicchirriai a su traitori cussus chi ancora in custas diris sighint a dimandai udiénzia a su segretariu de s'Udc preghendi de fai una liga po salvai is próprius amministrazionis comunalis totu postas mali?".