Domus de is istudiantis: cun d'una delibera de su mes''e austu sa Giunta regionali pigat 15 milionis a ddu su donat a crèsias e museus

(IlMinuto) - Casteddu, 27 de su mes''e ledaminis - Is 15 milionis de eurus, chi s'accordu quadru cun su Cipe de su 2006 iat destinau a is domus de is istudiantis in sa cittadi de Casteddu, funti stetius donaus a is museus e a is crèsias cun d'una delibera de sa Giunta regionali de su 6 de su mes''e austu de ocannu. Ddu dinùnziat oi, cun d'unu articulu intitulau "Chiese e case dello studente. Primi effetti della lobby delle sottane" su situ, accanta a su Psdaz, "Sardegna e Libertà", promòviu de su consilleri regionali Paolo Maninchedda. Sa delibera  de sa Giunta fatta in su mes''e austu at ritoccau is finanziamentus "po mori de sa premura de assignai is traballus intru su 31 de su mes''e paschixedda de su 2009". Is 15 milionis funti stetius assignaus a su finanziamentu de calincunu museu, tra is calis su Betile ("chi - si podit liggiri in sa nota - at a biri sa fini de s'assignazioni sua in su mes''e paschixedda  de ocannu (?)") e de 15 cresias, de is calis ottu funt in sa diòcisi casteddaia. "S'Ersu de Casteddu - narat su post - at perdiu 15 milionis de eurus chi funt indispensàbilis po sa domu de s'istudianti de s'"ex area Sem" e po cussa de via Is Maglias. Is istudiantis funt in giru
paghendi affittus incredibilis". "Su livellu de tolleranzia de su Psdaz - custa est sa conclusioni de s'articulu in su magazine online de Maninchedda - chi riguardat calincuna esagerada presenzia de sa crèsia sadra in sa politica regionali - est accanta de arribai a su livellu de guardia.