Finanziaria 2010: sa furriada de s'Anci, sa manovra de sa Giunta "no respetat sa lei regionali".

13 Ladàminis 2009
(IlMinuto) – Casteddu, 13 de su mes''e ledaminis - S'Anci de sa Sardigna bullat sa finanziaria regionali 2010 de sa Giunta Cappellacci, una manovra chi - spiegat una nota stampa - donat a su fundu unicu po is comunus e is provìnzias scéti 20 millionis de eurus, pagu si pensaus a is 150 millionis previdius de sa lei regionali. Cun sa finanziaria proposta de sa Giunta de centrudestra comunus e provìnzias no ant a beneficai de is efetus positivus de sa batalla po is intradas. "Is intradas de sa Regioni - precisat sa nota Anci - crescint de 3.161 millionis de eurus, a fronti de un'ispesa prus manna po sa sanidadi e is trasportus de 1.529 millionis, cun d'unu saldu netu de 1.632 millionis de eurus". A cust'aumentu de is intradas no currispondit s'aumentu de is risorsas po comunus e provìnzias bófius de sa normativa. "Sa lei regionali 29 de su mes''e maju de su 2007 - spiegat su documentu - narat ca su fundu unicu de is entis de su territoriu depit essi automaticamenti e proporzionalmenti adeguau a is magioris intradas tributarias netas de sa Regioni, chi funt de 1.632 millionis de eurus. Custa lei no esti stetia respetada de sa Giunta regionali in sa predisposizioni de su bilànciu regionali".
© RIPRODUZIONE RISERVATA