"Piano casa": custumerì su presidiu de Wwf, Legambiente e Italia nostra. S'adesioni de sa Cgil

(IlMinuto) – Casteddu, 6 de su mes''e ledaminis - Crescit su no a su "piano casa". Custu merì a is 18.00, a facc''e su Consillu regionali, s'at a tenni unu presidiu aprontau de  Wwf, de Legambiente e de Italia nostra po "salvai is costas sadras". "Cun s'aprovazioni de su segundu artículu de su 'piano casa' - si podit liggiri in d'una nota fatta connòsciri de is aprontadoris - su Consillu regionali at fattu sì ca, po sa primu borta a pustis de 30 annus, ddoi siant aumentus de cubaduras in sa fascia de is 300 metrus de su mari". S'iniziativa de is organizzazionis ambientalistas at biu s'adesioni de sa Cgil regionali, chi at a participai a sa manifestazioni. "S'iscera de intervènniri po s'interessu alberghieru - afirmat su sindacau in d'una nota stampa - po mellorai sa capassidadi de aghilli genti e arricchiri s'oferta (cungressuali, ricreativa, sportiva) in d'una lógica de allonghiamentu de sa stagioni turistica, est azzettabili. Cussu chi no est claru est cali lógica possat ai ispirau sa misura chi fait in modu de aumentai is volumetrias de is domus privadas in sa fascia de is 300 metrus, si no cussa bófia de sa boluntadi de destruiri una politica de tutela e de respetu". "Su disignu de lei - dimandat sa Cgil - andat modificau atressu de su cunfrontu cun is partis sozialis".