Sa resposta a su síndigu Floris: "At giai individuau su 'disterru' aundi separai is 'iseredaus' de su cuarteri de Casteddu 'e susu?"

(IlMinuto) – Casteddu, 8 de su mes''e ledaminis - "Afirmaduras grais chi ofendint su decoru e sa dignidadi de is abbitantis de su cuarteri". Aici Irs-Casteddu bit is fueddus naus de su síndigu de Casteddu, Emilio Floris, chistionendi de is progetus de s'amministrazioni po su futuru de su cuarteri istoricu casteddaiu de Casteddu 'e susu. "No depeus lassai sa zona a is iseredaus - custa sa frasi de su primu cittadinu de Casteddu scritta in su documentu de su movimentu indipendentista - est nezzessàriu traballai po mellorai sa cantidadi e sa calidadi de is residentis, e poita innì torrit a bìviri sa media burghesia". S'idea de cittadi de s 'Irs est totu un'atera cosa. "Iaus a bolli dimandai a su Síndigu - si podit liggiri in su documentu - si at giai agatau su 'disterru' aundi separai is 'iseredaus' de su cuarteri de Casteddu 'e susu". "Si su cuarteri de Casteddu 'e susu - sighit sa nota - in custus ùltimus bint'annus no est diventau unu logu totalmenti abbandonau, prus ca a s'agiudu de is amministradoris chi ddoi funti stetius in totus custus annus, ddu depeus a s'apómpiu, a sa cura e a s'amori de chini ddoi bivit, tra custus ddoi funt artigianus, is professionistas e puru is extracomunitarius".