Zuncheddu (Rossomori): tocat a fai una Commissioni sanitaria po vigilai is efetus de s'imbruttamentu in is areas industrialis e acanta de is basis militaris

(IlMinuto) – Casteddu, 16 de su mes''e ledaminis - Fai una Commissioni sanitaria permanenti po vigilai is efetus chi s'imbruttamentu tenit po sa popolazioni. Est cantu pedit a sa Giunta regionali una mozioni presentada in is diris passadas de sa consillera de is Rossomori Claudia Zuncheddu. Sa sardista de sinistra proponit s'istituzioni de una commissioni "autónoma e scapiada de is interessus localis, cun sa concertazioni de is Istituzionis, de is Universidadis, cun  ténnicus e espertus riconotus, e cun s'agiudu de is associazionis chi in is annus si funt impegnadas in su setori de sa saludi de ambienti e de is popolazionis". A sa luxi de is datus statisticus meda malus, Zuncheddu proponit s'istituzioni de un'organu scapiau de is interessus economicus, chi fazat unu costanti controllu po sa saludi de is sadrus. Is statisticas - si podit liggiri in su documentu - "dinunziant un'incidènzia meda manna de maladias tumoralis tra is sadrus. Particorlarmenti colpius funt is traballantis de is industrias". Is datus uficialis (indagini Ras-Asl 1981-2001) chistionat claru: in Portescùsi, po fai un'esémpiu, is mortus po mori de is maladias chi colpint sa respirazioni funti stestius 205 (contra a is 125 chi s'ant essi depius berificai in basi a sa media italiana) e s'incidènzia de cancru a is prummonis est de su 24 po centu prus manna de su datu médiu.  Funti stetius registraus datus gravis puru in is areas industrialis de Sarròccu e Pòrtu Turre. Pagu bellus puru is nùmerus de is areas militaris: in sa zona de Sa Madalèna, un'ateru esémpiu, su datu de su tumori a sa vessica est de su 121 po centu prus mannu de cussu nazionali.