Casteddu, 600 istudiantis e precarius sfilant po difèndiri s'istruzioni pubblica contra a is taglius fattus de su Guvernu

(IlMinuto) - Casteddu, 17 de su mes''e totussantus - Su 17 de su mes''e totussantus de su 1939, in Cecoslovacchia, centinaias de istudiantis chi si opponiant a sa gherra funti stetius arrestaus e boccius de is nazistas. Oi, a pustis de 70 annus, in Casteddu, comenti in medas ateras cittadis, circa 600 istudiantis de s'Universidadi e de is iscolas superioris ant manifestau - po cussu chi de su 1941 est s'International Students Day - po nai no a is progettus de riforma de s'instruzioni portaus innantis de su Guvernu. Is manifestantis, partius de prazza Garibaldi, funt arribbaus in via Roma a mangianu tradu, blocchendi su tràvigu de una de is prus importantis vias de sa cittadi. A sa manifestazioni ant partecipau s'"Udu", su "Movimento studentesco" casteddaiu, is organizzazionis de is giòvanus de su Prc e de su PdCi, su collettivu Entula Arrubia e su "Comitato precari della scuola" de Casteddu. Is precarius de s'iscola, chi ant contestau àncora po una borta s'accordu Baire-Gelmini a facc''e sa sedi de su Consillu regionali, ant a presentai cenàbara a merì (a is 16.00, Cineteca sarda) un'iniziativa noa de lota: una petizioni populari po difèndiri s'iscola pubblica.