De Paolo Fresu e Uri Caine a s'"interpretazioni" de Miles Davis: sabudu de stellas in s'European Jazz Expò de Casteddu

(IlMinuto) - Casteddu, 24 de su mes''e totussantus - Paolo Fresu e Uri Caine, Musica Ex Machina, is progettus "Remembering Lester" e "In a Silent way": sa diri de sabudu in s'European Jazz Expò de Casteddu - chi in tres diris at arregortu 30milla personas - at offertu unu "menu" capazzi de soddisfai puru is personas prus esigentis. A is 17, in su "Palazzo dei Congressi de sa Fiera", Paolo Fresu at obertu is danzas cun su pianista Uri Caine. Una collaborazioni - chi finzas a custu momentu at prodottu duus album in istudiu - aundi su "combo", cun is Alborada String Quartet, at eseguiu musicas originalis de cuss''e totu, chi funti stetias alternadas cun componimentus de musica classica e componimentus standard - s'immancabili Davis - e classicus modernus de sa canzoni italiana. Funti stetius appreziaus puru is Musica Ex Machina, guidaus de su pianista Guido Coraddu - cun Sanna e Sedda a sa sezioni ritmica e Bachis a sa trumba -. Su gruppu at propostu componimentus de sa band faendi puru un'interessanti “Bitches of brew” , cun sonus swing, ammesturaus a is tradizionis prus varias (de dixieland a is Balcani) e a sonus funky, salsa e tangu. A is 20.30 sa perfomance de sa band de sa cantanti norvegesa Mari Boine, cun artistas scandinavus e africanus, at lassau su pubblicu a bucca oberta cun sa musica de s'ùltimu album "Sterna Paradisea", bessiu de pagu tempus cun sa Universal. Cun d'una boxi capazi de arregordai sa tradizioni de sa Lapponia intricciada a componimentus amesturaus de influssus jazz e folk, sa Boine at incantau su pubblicu cun d'una musica aundi bivint impari is ispazius prenus de nii de su Nord-Europa e cussus de su Sud-Africa (aundi su discu esti stetiu registrau). Sa sala blu esti stetia teatru, a partiri de is 22, de “Remering Lester”, seguramenti s'eventu prus attendiu de sa serada. Guidau de Isio Saba - po unu periodu manager de Bowie e de s'Art Ensemble of Chicago - su progettu at uniu musicistas, collaboradoris e amigus de Lester Bowie tra is calis ddoi funt Antonello Salis (accordeon), Enrico Rava a sa trumba, su batterista Don Moye, su fradi de Lester, Joe, a su trumboni, e su fillu a su pianu forte. In su cursu de sa serada, a custu gruppu "obertu" si funt unius is Sousaphonix, chi ant regalau a su pubblicu is classicus de sa produzioni de Bowie, de “Strawberry mango” a is atmosferas cubanas de “Villa Tiamo”, finzas a su finali de "Odwalla" e a is componimentus dedicaus a su cumpangiu de viaggiu mortu giòvanu. Meda aspettu puru po su progettu “In a silent way”. Su gruppu, guidau de Maurizio Martusciello po sa parti elettronica, at fattu una performace chi, cumenzendi de s'album meda famosu de Miles Davis - meda importanti po su jazz elettronicu - no esti stetia scéti un'interpetazioni/offerta ma una bera opera de iscritura noa e de "celebrazioni de su cambiamentu" a pustis de 40 annus de sa bessida de su discu istoricu.