Rifondazione comunista: Stocchino, " Cabai is manus de s'Asarp e de sa 'Casamatta' de Cuartu Sant'Alèni"

(IlMinuto) – Casteddu, 11 de su mes''e totussantus - In su 1999, a pustis de ot'annus de traballu, s'Asarp iat arriciu su Prémiu nazionali po sa solidariedadi de sa Federazioni italiana po su volontariau. De calincuna diri, sa presidenti de s'associazioni, Gisella Tricas, est indagada po s'esercìziu abusivu de sa professioni medica, po mori de un'espostu fattu in su mes''e argiolas de unu psichiatra de s'ispidali Santissima Trinità po sa gestioni de sa domu família "Casamatta", in Cuartu Sant'Alèni. In difesa de s'esperiènzia de casi bint'annus de s'Asarp est cabau in campu su Prc de sa Federazioni de Casteddu. "'Casamatta' - scriri su segretariu federali de 'Rifondazione comunista' Giuseppe Stocchino - esti stetia ogetu de dinúnzia de parti de unu médicu de sa Asl de Casteddu. Dinúnzias de matrataméntus a is personas chi funt in sa domu, nonostanti is beríficas fattas de su "Nucleo operativo antisofisticazioni" de is Carabbineris si funt dimostradas senz''e fundamentu". "Comenti scriri beni chini conòsciri de acanta su chi fait s'associazioni de is familiaris - spiegat s'esponenti de su Prc - 'Casamatta' rappresentat un'esémpiu de is possibbilidadis de assistiri is personas totalmenti". "Bolleus - serrat Stocchino - manifestai solidariedadi a Gisella Trincas, a is familiaris e a is operadoris de s'istruttura, cunvintus ca su diritu a sa saludi, po si podi esercitai, tenit abbisóngiu no scéti de operadoris sanitarius capazzis, ma puru de sa vigilanzia atenta de is familiaris e de chini si serbit de is serbizius".