Tuvixeddu: Zuncheddu (Rossomori), su Comunu atribbuiscit " a chi tenit su dinai" su diritu de decídiri de s'assentu de su territoriu.

(IlMinuto) – Casteddu, 18 de su totussantus - "Mentris su Comunu de Casteddu recurrit ancora a su Tar contra a sa Soprintendenzia, chi bollit tutelai un'area mineraria antiga chi s'agatat in su territoriu de Tuvixeddu, abarrant in campu is arrexonis de chini no acetat ca su ciumentu diventit sa mesura chi s'imponit a sa necropoli punica prus manna e a sa memória istorica de su logu". Ddu narat cun d'una nota sa consillera comunali e ragionali de is Rossomori Claudia Zuncheddu. "Est scandalosu - precisat sa sardista de sinistra - ca su Comunu considerit faziosu su tentativu de tutela de parti de sa Soprintendenzia. Segundu custa mazorànzia de centrudestra is paesaggius e s'identidadi de is logus si livellant totus a mesura de is cuarteris senz''e ànima progetaus de genti chi bollit scéti guadangiai. Est beru chi custa borta s'argumentu no est s'eredidadi punica, unu patrimóniu chi superat dognia istima, un'istoria antiga chi no esti stetia mai arrespetada de is amigus de 'Betoniera Selvàgia'. Fueddaus in custu casu de una parti pagu conòscia de antiquària industriali in su coru de una cittadi importanti". "Àncora una borta - concluit Zuncheddu - una pubblica amministrazioni parrit ca si bollat privai de s'autoridadi de decídiri de s'assentu de su territoriu, donendiddu a chini tenit su dinai, senz''e s'interessai de cussu chi est s'interessu pubblicu".