Indipendentismu: Cumpostu (Sni) bullat sa proposta de fai listas únicas fatta de su "presidenti" de Malu Entu

(IlMinuto) – Casteddu, 13 de su mes''e gennargiu - "Indipendentistas unius, calis e de chini?". Cun custus fueddus su cordinadori nazionali de Sardigna Natzione Indipendentzia, Bustianu Cumpostu, si ndi stresiat de sa proposta fatta in is diris passadas de Salvatore Meloni "presidenti de sa Repubblica de Malu Entu" de fai listas indipendentistas únicas. "Beneus a sciri de unu de is giornalis sadrus - scririt Cumpostu in d'una nota stampa - ca su 9 de su mes''e gennargiu in Lodìne is indipendentistas chi furiant in s'atóbiu promòviu de Salvatore Meloni ant decidiu de presentai listas únicas a is elezionis provinzialis e comunalis de su mes''e maju". "Intendu su doveri de precisai - narat Cumpostu - ca in cuss'atóbiu Sni no furiat presenti, ddoi furiat scéti calincunu militanti senz''e dèlega, comenti no furiant presentis Irs, A Manca pro s'Indipendentzia, Psdaz e Rossomori, po custu motivu no est claru de chini depint essi formadas custas listas únicas". Cumpostu est in disacórdiu puru cun is modus usaus po convocai s'atóbiu. "Candu si bollit fai beni calincuna cosa impari - spiegat s'esponenti de Sni - is atóbius si cuncordant (...). No est seriu convocai sa genti mandendi email cuatru diris primu de s'atóbiu (...) usendi nomíngius pagu bellus po is leader indipendentistas".