Milia in s'Arlem: "A bia de unu guvernu de su Mediterraneu. Tocat a garantiri sa libera circulazioni de is populus"

(IlMinuto) – Casteddu, 25 de su mes''e gennargiu - "Traballaus po fai unu guvernu de su Mediterraneu". Est cantu at afirmau su presidenti de sa provìnzia de Casteddu, Graziano Milia, in ocasioni de su primu atóbiu de s'Arlem (s'assembrea regionali e locali euro-mediterranea) chi s'est tentu su 20 e su 21 de su mes''e gennargiu in Barcellona. "Po arginai una crisi destruidora comenti cussa chi seus bivendi - at precisau Milia in Catalogna - tocat a puntai, po sa ripresa, a s'isvilupu de su territoriu (...). Su caminu est cussu de promòviri sa libertadi de càmbiu e su cumérciu in su Mediterraneu e garantiri sa libera circulazioni de is populus". S'Arlem est fatta de 84 personas: 42 funt is rappresentantis de s'Unioni Europea e 42 is rappresentantis de s'Africa de tramuntana, de s'area balcanica e de su Mediu Orienti.