Soru bullat Cappellacci po su nucleari e annunziat una mozioni de portai in Consillu (perou no narat nudda po s'odg de Salis)

(IlMinuto) - Casteddu, 27 de su mes''e gennargiu - "Su presidenti de sa Regioni at nau "ant depi passai asuba de su corpu miu" (primu de costruiri una centrali nucleari in Sardigna, ndr), nosu no pedeus su sacrificiu personali, ma assumancu su sacrificiu, comenti ant fattu is presidentis de ateras regionis, de fai unu recursu contra a una lei chi est incostituzionali (...) chi passat asuba de su corpu de totus is sadrus". Aici su leader de "Sardegna democratica", Renato Soru, accusat Cappellacci de tenni pagu coragiu a facc''e su Guvernu nazionali po sa chistioni de su nucleari, in su cursu de su cunvegnu chi s'est tentu sàbudu passau in s'HOtel Mediterraneo po chistionai de s'energia. Mr. Tiscali pigat a straullus Cappellacci, ma si nd'iscarescit de arregordai s'odg contra a sa costruzioni de una centrali nucleari in Sardigna approvau de tutus is presentis in su Consillu regionali su 23 de su mes''e cabudanni de su 2009, grazias a sa proposta de Adriano Salis (Italia dei Valori). "Assumancu Cappellacci tengat su coragiu de fai una delibbera de Giunta aundi si narat ca totu su Consillu regionali est contra a su nucleari, comenti esti accadessiu una cida fait in Sicilia, forsis iant a firmai totus is consilleris. Nosu teneus un'atera posizioni, e - narat Soru - pensu ca iaus a podi portai de pressi  una mozioni in Consillu regionali po custa chistioni".