Suicidiu in Buoncammino: Caligaris (Sdr), efetu tragicu de s'affollamentu de is presonis

(IlMinuto) - Casteddu, 7 de su mes''e gennargiu - "Is condizionis de affollamentu de is presonis e su nùmeru basciu de is agentis de "Polizia penitenziaria" funt is causas prus importantis de sa situazioni  meda maba de is presonis italianus. Su suicidiu de Celeste Frau est un'ateru documentu umanu de isconfitta po totus. In Buoncammino no si podint sempiri fai miraculus. Sa morti de unu presoneri est una chistioni chi tocat totus". Ddu narat cun d'una nota sa presidenti de s'associazioni "Socialismo Diritti e Riforme", Maria Grazia Caligaris. "Candu su nùmeru de is presoneris crescit in manera aici manna - narat - est meda difìcili allacanai s'incòmodu chi crescit meda po is festas. In Buoncammino funti stetius superaus de meda tempus is nùmerus possibbilis de personas e aintru de is cellas crescint is difficoltadis cun medas arriscus po is presoneris de si fai mali a solus". Cun prus de 500 presoneris si registrat difatis unu nùmeru de agentis chi no est giustu. "Mancant - narat sa Caligaris - difatis 70/80 unidadis po garantiri sa seguresa e prevenniri fattus tragicus. No si podit nemancu no notai ca is condizionis de saludi de medas presoneris funt gravis e ca sa mancanzia de attividadis aumentat e diventat inutilidadi de sa vida". "S'affollamentu de is presonis  - narat ancora s'esponenti socialista - est una pena chi s'aciungit a s'ausenzia de libertadi".