Zuncheddu (Rossomori): "Abasciai is costus de sa politica e cumbàtiri is ausenzias. Sa Presidenti Lombardo pubblichit s'elencu de is consilleris presentis de candu est cumenzada sa legislidura"

(IlMinuto) – Casteddu, 25 de su mes''e gennargiu - No est mai tropu tradu po abasciai is costus de sa politica e po cuntrastai is ausenzias in Consillu regionali. Nd'est cunvinta Claudia Zuncheddu, sa rappresentanti de is Rossomori in s'assembrea de su populu sadru. "In s'ùltimu atóbiu de su Consillu regionali primu de sa pàusa de Paschixedda - afirmat Zuncheddu in d'una nota - apu espressau sa nezzessidadi de cumenzai unu processu po moralizzai sa politica de su Consillu regionali cun s'abbatimentu de is costus de sa politica partendi de is stipendius de is consilleris (...)". "In d'unu momentu meda grai po sa crisi de s'ocupazioni (...) - precisat s'esponenti sardista de sinistra - is sadrus no depint prus suportai sa carestia de sa politica". Sa consillera de is Rossomori donat batalla puru a chini fait medas ausenzias e curregit calincuna informazioni pubblicada pagu tempus fait de su giornali sadru prus bendiu. "'L'Unione Sarda', in s'artículu de su 22 de su mes''e gennargiu firmau de Enrico Pilia - spiegat Zuncheddu - citat is nòminis de dexi consilleris presentis (consillu de 21 de su mes''e gennargiu, ndr): noi de su centrudestra e unu de s'oposizioni. Noa chi no narat sa beridadi e chi no tenit fundamentu. A is dexi - aclarat s'esponenti de is Rossomori fueddendi de s'atóbiu in chistioni - furiaus in ses e, bonèsa 'e cussu, su nòmini miu no resultat tra is presentis nonostanti sa firma in su registru de is presénzias (...)"- "Is ausenzias in Consillu regionali de parti de is consilleris de su centrudestra est a nai pagu una cosa 'normali', ma funt cussus chi guvernant e cussus chi depint garantiri su nùmeru legali, mentris po nosu fai oposizioni bollit nai puru sceberai de s'astèniri de su votu. Sa nostra presénzia no depit garantiri sempiri de fai passai is leis insoru, senz''e nai ca custas no funt cundividias de nos''e totu. Est doveri de sa presidenti Lombardo, e no de oi, - concluit Zuncheddu - fai connosci is ausenzias de totus is consilleris finzas de sa primu diri de sa legisladura".