Nucleari: 17milla firmas po su referendum promòviu de Sardigna Natzione. Forsis a su votu in su mes''e maju

(IlMinuto) – Casteddu, 9 de su mes''e fiàrgiu - Tra calincunu mesi, forsis in is próprias diris de is elezionis amministrativas de su mes''e maju, su populu sadru at essi lamau a s'espressai po pòniri o po no pòniri is centralis nuclearis e is depósitus de is ferrinas in s'Isola. Custu mangianu Sardigna Natzione at difatis presentau in sa "Corte d'Appello" de Casteddu is casi 17milla firmas (7milla in prus de cussas previdias de sa lei regionali 20 de su 1957) arregortas po su referendum consultivu chi narat: "Ses contràriu a pòniri centralis nuclearis e depósitus de ferrinas radioattivas in Sardigna (...)?". Po arregolli is firmas, promòvias de su partidu guidadu de Bustianu Cumpostu, ant agiudau su "Comitato No Nuke" e sa "Confederazione Sindacale Sarda". "Eus circau de ponni in mesu is aterus movimentus indipendentistas - at precisau Giampiero Marras, tra is primus a firmai - chi perou si funt acorconaus, ma no podiaus abetai cun d'unu perígulu aici grai". "Seus cuntentus meda poita esti stetiu fattu unu passisceddu ainnantis - at nau sa dirigenti de Sni Aurora Pigliapochi - su sobi est s'única risorsa nucleari chi bolleus usai e su referendum est unu modu po afirmai sa soverania nostra".