Presonis. Caligaris (Sdr): Apretu de is familiaris de Catgiu, presoneri in Secondiglianu. "Nesciuna nova de prus de unu mesi"

(IlMinuto) – Casteddu, 24 de su mes''e fiàrgiu - "Seus meda apensamentaus poita in 26 annus de presonia no ddoi est mai stetia una mudesa aici longa. Pedeus iscedas de su parenti nostru, ma de su presoni no est arribbada nesciuna arrespusta. Seus timendi po sa vida sua biu is gravis maladias chi ddu flagellant". Est s'apellu chi is familiaris de Francesco Catgiu, 68 annus, de Orgòsolo, presoneri in su presoni de Secondiglianu abbia de Scampia, ant fattu a s'associazioni "Socialismo Diritti Riforme" ammostendi un'ànsia mala po sa saludi de su parenti insoru ricoverau de su 16 de su mes''e ledaminis de su 2008 in su Centru "diagnostico terapeutico" de s'Istitutu de Pena. "Francesco - at nau s'anziana sorresta Maria Giuseppa Mesina – no est mai mancau a s'apuntamentu telefonicu, nemmancu in is momentus de arragu prus mannu.
Est una persona chi tenit unu caràtiri incolliosu, ma cun mimi e cun is fillus mius at sempiri mantenniu unu raportu fissu. Sa saludi pagu bella de cuss''e totu no si fait perou abarrai trancuillus. Est po custu ca pedeus s'agiudu de bosàterus".
"Aghillendi s'apretu de is familiaris - precisat sa presidenti de Sdr Maria Grazia Caligaris, chi in prus de un'ocasioni s'est ocupada de Catgiu sollicitendi su trasferimentu suu in d'unu presoni de s'Isola - eus circau po debbadas de podi sciri calincuna cosa de su presoneri circhendi su capellanu de su presoni e puru sa Direzioni de Secondiglianu".