"Uranio impoverito". Gettiamo le Basi: "In su 'mille proroghe' s'abbonu po sa Difesa. Is Parlamentaris sadrus funt masedus e zeracus"

(IlMinuto) - Casteddu, 19 de su mes''e fiàrgiu - "Tra is milla pígias de su decretu 'milleproroghe' su Guvernu e is poderis fortis faint manìxius po fai passai una spézia 'e cosa comenti su 'lodo Alfano', un'abbonu-dispensa po sa Difesa e is Forzas armadas". Est cantu dinunziat cun d'una nota su "Comitato Gettiamo le Basi". "Sa decisioni - si podit liggiri in su documentu - bollit destrui is resultaus de sa Commissioni parlamentari de inchiesta po s'"uranio impoverito" chi at otentu s'òbbligu de cautela e su doveri de s'amministrazioni de sa Difesa de recumpensai is família de is personas bocias, sordaus e civilis chi funti stetius corpius de is atividadis de is poligonus".
Segundu su movimentu guidau de Mariella Cao su decretu "mille proroghe" bollit puru frigai/firmai is sentenzias de sa Giustízia chi ant assegurau is responsabbilidadis de sa Difesa e dd'ant cundennada a recumpensai is famílias de is sordaus mandaus in is territorius de guerra e bocius de is 'pruinis amigus' chi tenint uraniu".
Su "Comitato Gettiamo le Basi" scorcorigat puru su cumportamentu de is politicus de sa Sardigna in Parlamentu. "No s'est intendia - narat sa nota - sa boxi de is parlamentaris sadrus contra a su corp''e coa de sa guerra chi donat unu corpu mortali a sa Sardinia (...), pigada a bussinadas e tosconada de is basis de sa guerra. Masedus e zeracus ant a sighiri a votai totus impari contra a sa própriu genti e a sa terra insoru".