Ex miniera de Futtèi. Petizioni po pediri s'agiudu de sa Regioni. Gig "No est atesu su sciàsciu de ambienti"

(IlMinuto) – Casteddu, 22 de su mes''e marzu - "Tui puru podis donai s'agiudu tuu a manera chi su territoriu de su comunu de Futtèi (...) pozat essi bonificau e pozat essi scongiobau su perígulu de un'avelenamentu de totu sa regioni". Est cantu scrint in Facebook is aprontadoris de una petizioni, destinada a su presidenti de sa Giunta regionali e a s'assessori de s'"Industria", po pediri sa bonífica de s'ex miniera de Futtèi. "Puru tui - acrarant - podis agiudai in modu cuncretu sa batalla de is ex minadoris de sa Sgm oi in cassa 'e integrazioni, chi de 18 diris ocupant una saba de su Palazu regionali in Casteddu, in viale Tranto". Su documentu, indirizau a Cappellacci e Angioni, dimandat ca is minadoris de sa Sardinia Gold Mining siant impitaus is atividadis de bonífica de su situ e in su cambiamentu de area in d'una "risorsa noa economica e de traballu".
In su situ chi aghillit s'ex miniera de oru - acrarat su 'Gruppo di Intervento Giuridico' - "ddoi est su perígulu de sciàsciu a s'ambienti. Scéti grazias a s'impreu de is traballantis lissenziaus de sa sociedadi mineraria s'est evitau in extremis un'arriunu mannu po s'ambienti. Finzas a candu? E su presidenti de sa Regioni Ugo Cappellacci aundi est? Pruscatotu, ita at fattu po evitai sa cosa?".
"S'arriscu chi su cianuru, s'arsénicu e ateras sustànzias bessant a foras impestendi s'arriu Santu Miali e is cundotas chi portant s'àcua in su Campidanu e in Casteddu - acrarat sa consillera provinziali de su Prc, Simona Lobina - est sempiri prus cuncretu".

Sa petizioni: www.subarralliccu.officinevida.eu