Galsi. Rossomori: "Po comenti seus postus est innútili e fait dannu a s'ambienti"

(IlMinuto) – Casteddu, 16 de su mes''e marzu - "Po comenti seus postus su "Gasdotto" Galsi arriscat de essi un'òpera innútili po sa Sardigna". Est cantu denunziat cun d'una nota sa consillera regionali e presidenti de is Rossomori Claudia Zuncheddu.
"Nonostanti siat progetau s'atraessamentu de totu s'Isola - ispiegat sa sardista de sinistra - is acapióngius e is rezas po ddu distribbuiri a is areas de is citadis e a cussas industrialis no funt ancora finanziadas in prenu e no funt progetadas".
No bastat. Is Rossomori precisant is arriscus meda mannus po s'ambienti acapiaus a su fàbbricu de s'òpera. Po custu ant presentau una mozioni in Consillu regionali cun s'obbietivu de fai impignai sa Giunta regionali a "avinculai s'opinioni insoru in s'ambitu de s'avaloramentu de is efetus chi custu iat a tenni po s'ambienti e de dognia atera atividadi amministrativa (...) a s'arrespetu de is pratus de "Posidonia oceanica" e de is areas de mari chi tenint una grandu importànzia naturalística (...)  e de is logus de importànzia colletiva de sa Sardigna".
Su giudíziu de is sardistas de sinistra po sa política ambientali de sa Giunta Cappellacci est sicu. "Batacollaus - afirmat Zuncheddu - su modu de custu guvernu regionali dessintotu fridu a sa chistioni de s'ambienti e chi, po mori de sa mandronia de sa conca e po mori de sa totali ignorànzia in matéria, no s'impignat a istudiai formas chi agiudint su caminu de su "gasdotto", formas chi siant prus pagu perigulosas e chi no strupint su logu".