Gioventudi Indipendentista difendit sa "dópia norma". "Scuscenziau chi acozat sa 'Limba sarda comuna'"

(IlMinuto) – Casteddu, 23 de su mes''e marzu - "Unu Pópulu, una língua, duus bariedadis! Unu Pópulu, una limba, duus bariedadis!". Cun custus fueddus, no po nudda espressaus in campidanesu e in logudoresu, Giuventudi Indipendentista difendit sa "política de dópia norma de is duas variantis", bullendi senz''e apellu cussu chi penzant Irs e Sni.
"S'opinioni de chini acozat su falsu e artifiziali standard de una 'Limba sarda comuna' - est nau in d'una nota - est scuscenziau e pagu giustu po sa mazorànzia de is sadrus, chi fueddat sa varianti campidanesa de sa língua sadra (...). In últim'anàlisi custa soluzioni arriscat realmenti de sperrai su pópulu sadru, faendi intendi una 'mazorànzia' stagiada de una 'minorànzia'".
"Sa soluzioni de sa dópia norma de is duas variantis, de séculus e séculus, scritas de sa língua sadra - precisat Gioventudi Indipendentista - (e no de is 'duas línguas' comenti modu sballiau e scuscenziau est stetiu nau) est s'unica soluzioni democratica, originali, positiva e capazi a aviai cussa política de salvaguàrdia, de avaloramentu e recúperu de su sadru in cussa chi est puru in sa terra nostra sa vida de dognia diri".
"Una soluzioni - acrarat su documentu - chi s'indipendentismu responsàbbili, acatau e modernu iat a depi fai própriu senz''e duténzia".
Si Gioventudi Indipendentista pigat is distànzias de Irs e Sni po sa chistioni de is duas variantis, su movimentu s'unit in veci "a sa dinúnzia de su mancau impiegu de su dinai destinau a is políticas linguisticas, chi est scéti sa punta de s'iceberg de una política chi andat ainnantis de meda tempus e chi no fait ateru ca si preni sa buca fueddendi de s'importànzia de s'avaloramentu de sa língua sadra ma, in is fatus, tenit sa culpa de no fai nesciunu passu cuncretu ainnantis".