Stracquadanio (Pdl) in su canali La 7: in Sardigna una centrali nucleari po fruniri a s'Alcoa. De Cappellacci dúbbius de pagu contu

(IlMinuto) - Casteddu, 24 de su mes''e marzu - "S'amigu miu Cappellacci tenit calincunu dúbbiu (po su fàbbricu de una centrali nucleari in Sardigna, ndr), perou su Presidenti de sa Sardigna narat custa cosa comenti si fessat una cositedda de pagu contu. Ingúnis eus tentu una chistioni meda séria: s'Alcoa, azienda meda importanti (...) in custu momentu in Sardigna. S'Alcoa est in manigius cun su Guvernu, chi est ammostendi una firmesa meda manna po podi salvai is postus de traballu. Sa produzioni de s'azienda tenit bisóngiu de unu consumu artu de energia (...). Si podeus tenni una produzioni de energia acanta est mellus, in prus su nucleari tenit bisóngiu de àcua meda". Cun custus fueddus, naus ariseru in su cursu de sa trasmissioni de su canali la 7 "Regionando", su deputau de su Pdl, Giorgio Stracquadanio, at pigau una posizioni po sa chistioni de sa decisioni de is logus aundi poniri is centralis nuclearis bófias de sa majoria de is parlamentaris de centru-destra. Su políticu de sa Lombardia, chi fait parti de sa "Commissione Affari Costituzionali", collegat su mantenimentu de is atividadis de s'Alcoa de Portovesmi a su fàbbricui de una centrali nucleari in s'Isola, giudichendi "de pagu contu" cantu nau de su Presidenti de sa Regioni Sardigna candu at chistionau de cust'argumentu.
"Sceberai su nucleari po una parti de is consumus de energia - acrarat su deputau de centru-destra de sa Regioni Lombardia - esti stetia un'iscera fatta de sa majoria de su guvernu. Custa esti stetia una proposta meda clara a is eletoris primu de sa campagna de is elezionis (...). Si Salvini (rapresentanti de sa Lega Nord presenti po su dibbàtidu in televisioni, ndr) narat ca sa Lombardia, su Venetu, su Piemonti andant ainnàntis cun s'energia de cussus 'e totu narant duas cosas beras: funt is territorius aundi ddoi est su prus artu consumu de energia e duncas, si giai produsint po cussas 'e totu, forsis no est su casu de poniri is centralis in cussus logus, po unu motivu meda simpli: s'energia depit essi distribbuia e in su cursu de custa divisioni 's'energia si perdit'".