Arrefudus de ollu: arriscu po s'ambienti in Pòrtu Turre

(IlMinuto) – Casteddu, 27 de su mes''e arbili - "1800 tonelladas de arrefudus de ollu arriscant de essi scarrigadas in mari si is impiantus de sa Pb Oil de Pòrtu Turre no ant essi postus in funzioni e controllaus de is operàjus de sa seguresa". Est cantu denunziat cun d'unu comunicau de imprenta s'imbasciadori nazionali de A Manca pro s'Indipendentzia, Cristiano Sabino.
S'arriscu de sa destrossa ambientali - acrarat Sabino - est causau de is impedimentus chi sa "burocrazia italiana" ponit po su cumenzu de s'atividadi de limpidesa de is arrefudus de s'ollu. In su 2009 sa PB Oil at difatis pigau s'azienda in fallimentu Distoms po sa gestioni de su cumpartu e, de su mes''e cabudanni, at spendiu pagu prus de unu millioni de euru po torrai a ponni in pei sa produzioni po mori de su blocu de s'Agenzia de is duganas".
"100 traballantis - precisat s'imbasciadori de aMpI - funt firmus e s'arriscat sa destrossa ambientali scéti po mori de sa burocrazia italiana chi, in veci de agiudai sa produtividadi e sa salvaguàrdia de s'ambienti, ponit medas e medas impedimentus a su cuminzu de sa produzioni".
In is diris passadas, cun s'obbietivu de pediri de fai torrai a cumenzai debressi s'atividadi, is traballantis de sa Pb Oil iant aprontau unu pichetu de protesta daennàntis a sa sedi de s'agenzia de Equitalia in Piandanna, chi aghillit is ufícius de s'Agenzia de is Duganas.