Nucleari: "duellu cun líteras" in su web tra sa scritora indipendentista Murgia e su senadori Pdl Massidda

(IlMinuto) – Casteddu, 2 de su mes''e arbili - Is afirmaduras televisivas de su parlamentari de su Pdl Giorgio Stracquadanio po su possíbbili fàbbricu de una centrali nucleari in s'Isola no ant concuistau is primus pàginas de is giornalis sadrus, ma in su web s'est obertu unu dibbatidu chi at interessau s'autora de "Il mondo deve sapere" Michela Murgia e su senadori berlusconianu Piergiorgio Massidda, possíbbili candidau de su centrudestra a sa presidénzia de sa Provìnzia de Casteddu in is elezionis de su 30 e de su 31 de su mes''e maju.
A su primu fueddu de s'esponenti de su Pdl in su própriu blog ("Stimau Stracquadanio, innoi su nucleari no ddu bolleus", piergiorgiomassidda.blogspot.com) est sighiu unu post (michelamurgia.altervista.org) aundi sa scritora - chi est contra a su nucleari - at fattu connosci cussu chi iat nau tempu primu su políticu paulesu, est a nai is afirmaduras in favori de s'àtomu.
S'arrespusta de su senadori no s'est fatta abetai: "Deu - at acrarau - no seu contràriu a su nucleari in Sardigna po mori de timorias de pipialla chi sa sciénzia at ammostau essi senz''e motivu, ddu seu poita tengu una bidea diversa de su modellu de isvilupu de s'Isola mia".
Sa bincidora de su Prémiu Dessì, indipendentista chi est acanta a is pensus de s'Irs, at arramaciau cun cussu chi at nau in matéria de nucleari una conca manna de sa sciénzia: "No cundividu s'opinioni chi tenit fustei po su nucleari (...) po su própriu motivu ispiegau de su físicu e prémiu Nobel Carlo Rubbia: su nucleari est fundau asuba de fontis chi funt spaciendi, est tennicamenti passau, impestat in modu senz''e torrada e oi tenit unu raportu prézius-benefízius chi no si podit afrontai si cunfrontau cun is ateras fontis diaderus límpias, comenti cussa de su soli".