Elezionis. Ferrando (Pcl): "Tradori candidau operàju e de s'àtera parti de sa barricada"

(IlMinuto) - Casteddu, 25 de su mes''e maju - "Candidaus un'operàju po sa Provìnzia de Casteddu poita seus e eus a essi de s'àtera parti de sa barricada. Ariseru, oi e cras". Est cantu at nau s'imbasciadori de su "Partito comunista dei Lavoratori", Marco Ferrando, custu mangianu in Casteddu po presentai sa lista de is elezionis provinzialis. Su candidau po sa presidénzia de su su Pcl est Nicola Tradori, 33 annus, operàju in cassa integrazioni de sa fabbrica po fau su súcuru de Biddesorris. "Nos - at nau Tadori - bolleus scéti fai is intaressus de is traballantis, de chini no tenit unu traballu, de is cassintegraus e de is istudiantis". Su programma de su Pcl donat difatis importànzia a sa defensa de is postus de traballu, ma no scéti. "Pedeus sa serrada e su mudamentu de is basis militaris po iscopus civilis - at aclarau Tradori - e naraus unu no sicu a su nucleari".
Tostu puru su giudíziu po is àteras sinistras presentis a is elezionis. "Ant traigiu is arrexonis de is traballantis - at nau Ferrando - e funt diventadas bículeddus críticus de unionis liberalis. A fac''e sa manuvra de 24 milliardus de eurus presentada de su Guvernu iat a essi necessàriu imbecis unu scontróriu comenti cussu de sa Grecia, una bera rebbellia de sa sociedadi".
Is críticas de su Pcl no arresparmiant s'Irs, presenti cun is listas suas in totus is otu provìnzias: "S'ùnicu modu po libberai sa Sardigna de sa colonizazioni - at nau Tradori - est costruiri unu guvernu de is traballantis".
Custu merì Ferrando e Tradori ant a tenni unu comíziu in Deximu Mannu (18.30, praza Municipio).