Palomba (Idv): "No bolleus cundennaus in is istituzionis eletivas. Sa decisioni de no acozai Milia est totu sadra"

(IlMinuto) – Casteddu, 11 de su mes''e maju - "'Italia dei Valori' esti stetia coerenti. Nesciunu si podit donai is curpas po cussu chi sa genti scit de essi unu méritu". Cun custus fueddus su candidau a sa presidénzia de sa Provìnzia de Casteddu de s'Idv, Federico Palomba, cummentat is afirmaduras fattas ariseru de Graziano Milia in sa primu bessida púbblica de s'alleànzia de centrusinistra.
"Milia - afirmat Palomba - at bófiu cumenzai sa própriu campagna eletorali in su signu de su scontru. No cun su centrudestra, ma cun 'Italia dei Valori', acusada de tenni una scassa autonomia de pensu, un'autonomia ausenti chi dda bidit acapiada a is pensus de is capus mannus nazionalis. No esti stetiu unu bellu cuminzu: ma nos no eus a acetai mai is zunzulladuras e no eus a finiri in s'aciocu e cun s'isultu".
Su sceberu de no acozai Milia - arregordat s'ex presidenti de sa Regioni - "po mori de su 'bagàgliu giudiziariu' suu, fut acrarau a s'imprenta sadra a pagus oras de sa nova de sa cundenna chi dd'iat corpiu. Su sceberu fut espressau primu de su capugrupu Adriano Salis e a pustis de mei".
"Sa decisioni - concluit Palomba - esti stetia totu sadra. Di Pietro dd'at scéti condividia e acozada poita coerenti cun su rigorosu códixi éticu nostru. Eus pediu prus de una borta a su Pd de indicai unu candidau chi andàt beni a totus. Si scit ca no bolleus cundannaus in su partidu nostru e ca no ddu su bolleus in nesciuna istituzioni eletiva".