Palomba (Idv): "No scéti acozus. Cantu nau de Carboni cunfirmat su murighíngiu tra afaris e política"

(IlMinuto) - Casteddu, 26 de su mes''e maju - "Is atrogus de Falvio Carboni iscritus de "L'Unione Sarda" e de "La Nuova Sardegna" cunfirmant unu murighíngiu pagu puliu tra afaris e política, chi at biu in mesu puru sa Regioni Sardigna no scéti cun acozus, ma cun berus 'pranus ativus'". Est cantu narat Federico Palomba, candidau po sa presidénzia de sa Provìnzia de Casteddu cun s'Italia dei Valori, cummentendi is primus pàginas de is prus importantis giornalis sadrus de oi.
"Medas inchiestas de sa giustízia - aclarat - partint de su fatu ca siat in atu "un'afracada de sa Sardigna". Partendi de s'afari malu de s'eolicu po s'ammanniai a àterus campus chi tenint collegamentus cun s'ambienti, custas inchiestas ponint s''acozau' Ignazio Farris (chi est impostu de Carboni e de su cordinadori nazionali de su Pdl Denis Verdini - puru custu asuta de inchiesta - a sa Regioni Sardigna) a sa guida de s'Arpas. Una pedina meda importanti po su rolu chi iat a pigai (S'"Agenzia regionale di protezione dell’ambiente"), (...) de su murighíngiu légiu chi est asuta de inchiesta in diversas procuras".
Palomba castiat puru a un'àteru Farris, Giuseppe. "Su candidau Pdl po sa Provìnzia de Casteddu Giuseppe Farris - narat su candidau de s'Idv - est in su coru de custu manixu, chi dd'at candhidau po s'incàrrigu de presidenti. Puru in cust'acuntéssia s'est móviu Denis Verdini, chi at fattu de totu po ndi sperdi s'àteru rapresentanti de su Pdl chi s'est presentau po sa cadira de presidenti, Piergiorgio Massidda. Po custu motivu Giuseppe Farris no narat nudda po sa chistioni de s'eolicu".