Provìnzia de Casteddu: in su 2009 perdius 6milla postus de traballu in sa massaria e s'industria

(IlMinuto) - Casteddu, 3 de su mes''e maju - "Si puru is aparénzias faint biri àteras cosas, determinadas de su diminuimentu de su númeru de is disimperaus, chi s'est abasciau de s'11,3 po centu in su 2008 a s'11 po centu, s'anàlisi de su mercau de su traballu narat ca in sa provìnzia de Casteddu su traballu est postu meda mali e sa cosa s'est aggravada meda peus no scéti si dda cunfrontaus cun in númerus nazionalis, ma puru cun cussus regionalis e de is diversas provìnzias sadras". Est cantu narat su segretariu provinziali de sa Cisl de Casteddu, Fabrizio Carta, cun su cummentu fattu asuba de is statisticas de s'Istat de is diris passadas. Segundu su sindacalista su diminuimentu de is disimperaus est causau prusetotu de su númeru artu de pensionamentus de su 2009 e de is medas personas chi ant renunziau puru a si circai traballu.
"Funt 10.000 - aclarat Carta - is personas chi, in d'un'annu, passant a unu statu in su cali no traballant. Est scéti po custu ca calat su númeru de is disimperaus chi, comenti scideus, est causau de su raportu tra is personas chi funt circhendi traballu (disimperaus) e is forzas de su taballu chi funt torradas a pagu cosa. Chi siat po s'imbeciamentu chi siat poita sa genti est disanimada e no circat prus traballu, is númerus de oi faint pensai e pintant unu cuadru chi no si movit". Su númeru de is personas chi traballant, s'est abasciau. "In sa massaria e in s'industria , ispiegat Carta - si funt pérdius 6milla postus de traballu".