Ambienti: Onufrio: "Acórdiu po sa protezioni de is 'Bocche di Bonifacio' e est bitória po Greenpeace. Immoi tocat a passai de is fueddus a is fattus"

(IlMinuto) – Casteddu, 16 de su mes''e làmpadas - "Oi est una diri importanti po sa protezioni de s'ambienti marinu e una bitória po Greenpeace, po sa Sardigna e po sa Corsica. Própriu innoi casi un'annu fait, asuba de sa Rainbow Warrior de Greenpeace, cun is síndhigus de su tretu sadru e corsu, iaus fattu un'apellu a is Ministrus po acastiai a custu mari".
Aici Giuseppe Onufrio, diretori esecutivu de Greepeace Italia, cummentat sa decisioni de is Guvernus de Itàlia e Francia de acastiai a is "Bocche di Bonifacio".
Ariseru, difatis, su Ministru de s'"Ambiente" italianu, Stefania Prestigiacomo, e su Ministru po s'"Ecologia" francesa, Jean-Louis Borloo, ant firmau in su portu de Palau un'acórdiu po dimandai de no fai passai is nais chi carriant cosas perigolosas in is "Bocche di Bonifacio".
Greenpeace pedit perou ca de is fueddus si passit debressi a is fattus. "Tocat a nai - arregordat s'organizazioni ecologista - ca s'istoria s'imparat e ca no sèmpiri sa firma de un'acórdiu est bastanti. S'acórdiu firmau de Francia e Itàlia in su 1999 po su fàbbricu de su Santuàriu de is "Cetacei" Pelagos, aintru de su cali s'agantat is "Bocche di Bonifacio", est famosu cun tristura po no ai portau a nesciuna bera protezioni de s'area".