Referendum: Cun Sni pigat pei su 'Comitau po su Sì contra a su Nucleari'. "Totus únius contra a s'àtomu"

(IlMinuto) – Casteddu, 8 de su mes''e làmpadas - "Unu 'comitau po su Sì Contra a su Nucleari', chi arregollat totus is aprous possíbbilis senz''e barrieras de pensu o de partidu, chi biat is citadinus, is amministrazionis de su territoriu, is forzas socialis e sindacalis, is traballantis e is aziendas mannas e piticas totus únius cun un'únicu iscopu: s'acórdiu contra a su perígulu nucleari e in difesa de su diritu de is sadrus de decídiri asuba de custu tipu de sceberus". Est custu s'istrumentu chi Sardigna Natzione indipendentzia bollit costruiri po portai a sa bitória su referendum po su nucleari previdiu po s'atóngiu chi benit.
Ddu fait sciri sa Direzioni nazionali de s'organizazioni indipendentista, reunia domínigu in Aristanis po programmai sa campagna po su referendum e po valutai is arrisurtaus de is elezionis amministrativas. "Sni - si ligit in su comunicau de sa Direzioni - pedit a chini bollat cundividi sa campagna contra a su nucleari, de intrai de protagonistas in su 'Comitau po su Sì Contra a su Nucleari' e cun custu proponimentu avisat una reunioni in Tàtari po su 20 de su mes''e làmpadas".
"In méritu a is bonus arrisurtaus eletoralis otentus de s'area indipendentista e sardista - acrarat sa nota de imprenta - Sni espressat un'augúriu de coru a Irs, a su Psdaz e a is Rosso Mori, ma abarrat cunbinta ca no at essi certu unu consilleri in prus o unu de mancu in is provìnzias de bixinau arrefudadas de s'eletorau a determinai su benidori de is sadrus, arremaciat e cunfirmat su própriu sceberu de s'ocupai de chistionis cuncretas comenti cussa contra a sa zerachia noa de su nucleari chi si bollit impòniri a sa marolla a sa nazioni sadra".