Bruno Bellomonte: aMpI cumenzat sa campagna de solidariedadi política e de arregorta de su dinai po portai sa genti in Roma a manifestai

(IlMinuto) - Casteddu, 21 de su mes''e argiòlas -  A Manca pro s’Indipendentzia cumenzat sa campagna de solidariedadi política a Bruno Bellomonte. De oi est difatis possíbbili agiudai s'organizazioni po su progetu de portai a Roma cantu prus genti possíbbili in ocasioni de sa grandu manifestada in programma po su 16 de su mes''e cabudanni, data de sa primu udiénzia de su processu a su dirigenti indipendentista.
"S'obbietivu - si ligit in d'una nota - est cussu de demostrai diaderus a Bruno sa solidariedadi nostra e, in su mantessi tempus, cussa de ammentai a su stadu italianu ca ponni in presoni unu presoneri políticu sadru no est una cosa chi su pópulu podit no biri e no valutai. Ammostai a su Stadu italianu ca no teneus nesciunu aficu in su giudíziu espressau de sa magistadura sua e ca no ndi riconosceus su balori".
Sa campagna - acrarat sa nota fatta connosci de s'organizazioni indipendentista de sinistra - "no s'at a firmai a sa primu udiénzia, s'arregorta de su dinai tenit s'obbietivu de agiudai chinisiollat a participai, a su processu e a is udiénzias de Bruno e de is àterus cumpàngius italianus incastraus de s'antiterrorismu italianu in cussa chi a custu puntu est un'azioni de opressioni meda crara, fundada asuba de ipótesi e senz''e nesciunu fundamentu".
Est possíbbili agiudai economicamenti sa cosa versendi du dinai in contu correnti: Alessandra Ruggiu poste pay 4023600453477236