Demuru (Irs): "Deus fueddat in sadru. Cugusi no est incuadrau cun sa gestioni 'berlusconiana' de Mani"

(IlMinuto) - Casteddu 20 de su mes''e argiòlas - Irs est de sa parti de don Mario Cugusi, su praidi "de is furesteris" de su cuarteri de sa Marina, in Casteddu, trasferiu totinduna po decisioni de s'arciobispu Giuseppe Mani.
"Don Cugusi - afirmat sa segretària nazionali de s'organizazioni indipendentista, Ornella Demuru - pagat su fattu de no s'essi incuadrau in sa gestioni de parzialidadi de su prelatu casteddaiu, pagat s'impignu suu fattu, impari a àterus praidis, in faori de sa liturgia in língua sadra, cun sa missa fatta cun traduzionis segundu cantu previdit sa norma canónica, chi esti stetia tempus fait proibbia de su Mussignori po arraxonis scapiadas de su diritu canónicu".
Demuru puntat su didu asuba de is raportus tra sa "gestioni Mani" e su centrudestra. "Su Mussignori esti stetiu su primu arciobispu in Sardigna a ai imbidau a unu pràngiu, in su seminàriu diocesanu, unu presidenti de su Consillu, cosa mai acuntéssia finzas a immoi, nemmancu a is tempus de sa DC. Su signu est cussu de un acozu craru a su partidu de Berlusconi, est signali de unu cumportamentu de gherra chi atuat, puru ma no scéti, in is sceberus suus chi andant contra a s'usu de sa língua sadra in sa missa".
"No s'arrisultat - concluit Demuru - ca Deus siat italianu e duncas no si cumprendit cali lógica ddoi siat apabas de s'azioni de Mani si no una lógica contrària a sa libbertadi religiosa de su pópulu sadru".