"Indipendentista presoneri". Cras in Casteddu cuferénzia de imprenta e dibbàtidu po chistionai de s'"acuntéssia Bellomonte"

(IlMinuto) - Casteddu, 14 de su mes''e argiòlas - "Poita de 'giustízia maba' no si ndi fueddit scéti in daisegus". Cun cust'obbietivu, cras in Casteddu (11.00, sedi Usb-Rdb, bia Maddalena 20), s'at a tenni una cuferénzia de imprenta po denunciai ancora una borta a chini fait informazioni e a sa genti is tortesas de s'acuntéssia Bellomonte: su dirigenti de A Manca pro s'Indipendentzia e ativista sindacali arrestau su 10 de su mes''e làmpadas de su 2009 cun s'acusa "chi fessat preparendi - si ligit in d'una nota de imprenta - in combutu cun àterus, atentaus contra a is capus mannus de su Stadu", primu de su G8 de Sa Madalèna. "Est de prus de un'annu - ammentant is aprontadoris de sa cosa - ca dd'ant liau sa libbertadi senz''e dd'ai fattu unu processu regolari. A aggravai sa cundizioni sua de persona innocenti (segundu sa Costituzioni atuali) e de presoneri s'est aciuntu su trasferimentu, acadessiu in su mes''e argiòlas de su 2009, in su presoni de Sianu -Catanzaru, est a nai in d'unu logu chi dd'impedit de gosai de is bisitas de sa família e de un'assistu legali giustu".
No scéti. A s'impresonamentu de un'innocenti s'est summada sa pérdida de su traballu. "Is ferruvias de su Stadu - precisat su comunicau - dd'ant lissenziau poita 'ausenti' de su logu de traballu".
Ant a pigai parti a sa cuferénzia de imprenta cordinada de Salvatore Drago ("Collettivo Anticapitalista Sardo") - Antonello Tiddia (Cumitau "Lavoratori Pro Bellomonte), Caterina Tani (mulleri de  Bellomonte), Claudia Zuncheddu (presidenti de is Rossomori e consilleri regionali), Vincenzo Pillai (segreteria regionali Prc) e Cristiano Sabino (imbasciadori nazionali de A Manca pro s'Indipendentzia).