Prc in Sestu. Stocchino: "Nudda assessori? Andaus a s'oposizioni"

(IlMinuto) – Casteddu, 12 de su mes''e argiòlas - "Is votus de sa Federazioni de sa Sinistra e de su Prc funt bellus candu permitint a su candidau a síndhigu de arribbai a su ballotàgiu e funt de imballiu candu arribbat su momentu de donai a sa forza política nostra incàrrigus de guvernu". Est cantu afirmat cun d'una nota Giuseppe Stocchino, segretàriu de sa Federazione de Casteddu de Rifondazione comunista, a pustis de s'esclusioni de su Prc de sa Giunta comunali noa de Sestu, guidada de su síndhigu Aldo Pili. Esclusioni chi portat - acrarat Stocchino - su Prc a segai cun su centrusinistra de sa bidda. "Iaus a essi pagu 'políticus' - narat su segretàriu - ma seus combintus ca is patus e is acórdius si depint arraspetai. Su Prc, po custus motivus e cun mala gana, de oi finzas a candu no s'ant a agatai soluzionis políticas chi adderezint custa disonestadi meda grai, at a abarrai in s'oposizioni. De is grupus dirigentis de su Pd de Provìnzia e de cussus de sa Citadi de Sestu, nos abetaus sa soluzioni a custa cosa grai fatta a dannu de sa 'Federazione della Sinistra' e de su Prc".