Bogaus duus giòvanus rom nàscius e crescius in Sardigna. Loy (Fondatzioni Ruggiu): "No funti stetius mai in nesciun'àteru logu"

(IlMinuto) – Casteddu, 14 de su mes''e cabudanni - "Própriu mentris su Parlamentu europeu aprovat una motzioni de censura contra a is bogadas de is rom fattas de su Guvernu francesu e arremaciàt, aici, puru sa censura contra a sa política de su Guvernu italianu, is fortzas de s'ordini de Casteddu intrànt a sa marolla in su campu 'nomadi' de Casteddu e pigànt duus giòvanus rom, un'ómini e una fémina". A fai connosci sa cosa est sa Fondatzioni Anna Ruggiu, cun d'unu comunicau de imprenta firmau de su presidenti Gianni Loy.

"S'ómini - precisat Loy - esti stetiu lassau líbberu a su merì cun s'órdini de lassai s'Itàlia intru cincu diris. Sa fémina iat giai arriciu unu fógliu de bogadura, po custu esti stetia processsada po 'diretissima'". Un'acuntéssia meda mala e assurda. "Laura e Zagor - acrarat su presidenti de sa Fondatzione - funt duus giòvanus ambos nàscius e sèmpiri bivius in Sardigna (A Terranòa e Casteddu), cun sa fedina penali pulia, e no funti stetius in nesciun'àteru logu e no connoscint àtera língua ca s'italianu e su romané, (sa língua insoru). Segundu su provedimentu de is autoridadis italianas, iant a depi bessiri de s'Itàlia po andai no si scit aundi, in d'unu logu chi no ant mai biu aundi si fueddat una língua chi no connoscint, senz''e su prus piticu metzu po bíviri".